SVD Postulancy

Pagninilay ni Post. Abundio Echavez III

Ika-23 Linggo sa Karaniwang Panahon Mateo 18:15-20

“Kapag may nanakit sa atin, pipiliin ba nating ayusin ang problema o palalain pa ito?”

Maraming problema sa ating lipunan ngayon ang nagsisimula sa hindi pagkakaunawaan, galit, paghuhusga, at tsismis. Sa halip na pag-usapan nang mahinahon ang ating mga problema, minsan ay pinipili nating magsalita nang patalikod o maghiganti. Dahil dito, nasisira ang mga ugnayan at lumalala ang mga hidwaan.

Sa Ebanghelyo ayon kay Mateo, itinuturo sa atin ni Hesus na kapag may gumawa ng mali sa atin, dapat natin silang kausapin nang mahinahon at nang pribado. Ang layunin nito ay hindi upang ipahiya sila, kundi upang tulungan silang mapagtanto ang kanilang pagkakamali at maibalik ang maayos na ugnayan.

Gaya ng paalala sa atin ng 1 Juan 4:7, mga minamahal, magmahalan tayo sa isa’t isa, sapagkat ang pag-ibig ay nagmumula sa Diyos. Nawa’y lagi nating piliing magmahal, umunawa, at magpatawad kahit na mahirap ito. Sa pamamagitan ng ating pagmamahal sa kapwa, naipapakita natin ang pag-ibig ng Diyos sa ating pang-araw-araw na buhay.